KERALA PRIVATE PRIMARY HEADMASTERS ASSOCIATION

Updates From General Secretary

പ്രതീക്ഷകളും പ്രതിസന്ധികളും:

പ്രധാനാധ്യാപകന്റെ അക്കാദമിക് സ്വാതന്ത്ര്യത്തിനായുള്ള പോരാട്ടം രണ്ടാം ടേമി ലേക്ക് കടക്കുമ്പോൾ

01/09/2026

    പൊതുവിദ്യാഭ്യാസ ശാക്തീകരണത്തിനായി നടപ്പിലാക്കുന്ന നൂതന പദ്ധതികൾ ക്ലാസ്സ് മുറികളിൽ മാറ്റത്തിന്റെ പുതുവെളിച്ചം വിതറുമ്പോഴും, വിദ്യാലയ ഭരണനിർവ്വഹണത്തിന്റെ നട്ടെല്ലായ പ്രധാനാധ്യാപക സമൂഹം അനുഭവിക്കുന്ന മാനസിക സമ്മർദ്ദങ്ങളും സാമ്പത്തിക പ്രയാസങ്ങളും അവഗണിക്കാൻ ആവാത്തവിധം സങ്കീർണ്ണമായിക്കൊണ്ടിരിക്കുകയാണ്. അക്കാദമിക് മികവിന് മുൻഗണന നൽകേണ്ട ഒരു സംവിധാനത്തിൽ, ഭരണപരമായ നൂലാമാലകളും അപ്രായോഗിക ഉത്തരവുകളും പ്രധാനാധ്യാപകരെ നിരന്തരം പ്രതിസന്ധിയിലാക്കുന്നു.

ഉച്ചഭക്ഷണ വിതരണവും പുതിയ സാമ്പത്തിക സമസ്യകളും:-

       ഉച്ചഭക്ഷണ പദ്ധതിയിലെ പ്രതിസന്ധി നാൾക്കുനാൾ വർദ്ധിക്കുകയാണ്. മുൻപുണ്ടായിരുന്ന PFMS രീതി മാറി, ഇപ്പോൾ BIMS വഴി SNA SPARSH ലൂടെ Noon Meal Contingent ബില്ലുകൾ മാറുന്നതിലും, BIMSലെ അലോട്ട്മെന്റ് വഴി Supplementary Nutrition ഫണ്ട് മാറി എടുക്കുന്നതിലും പ്രധാനാധ്യാപകർ നേരിടുന്ന സാങ്കേതിക തടസ്സങ്ങളും കാലതാമസവും അങ്ങേയറ്റം ആശങ്കാജനകമാണ്. സാധനങ്ങളുടെ വിലയിലുണ്ടാകുന്ന വർദ്ധനവും കൃത്യസമയത്ത് ഫണ്ട് ലഭ്യമാക്കാത്തതും സ്കൂൾ മേധാവികളെ വലിയ സാമ്പത്തിക ബാധ്യതയിലേക്കാണ് തള്ളിവിടുന്നത്.

           ഇത്തരം ദൈനംദിന ഉച്ചഭക്ഷണ ചുമതലകളിൽ നിന്നും പ്രധാനാധ്യാപകരെ പൂർണ്ണമായും ഒഴിവാക്കാതെ അക്കാദമിക് മേൽനോട്ടം കാര്യക്ഷമമാക്കാൻ കഴിയില്ല. മറ്റ് പല സംസ്ഥാനങ്ങളിലും വിജയകരമായി നടപ്പിലാക്കിയ കേന്ദ്രീകൃത അടുക്കള (Centralized Kitchen) സംവിധാനം കേരളത്തിലും നടപ്പിലാക്കേണ്ട സമയം അതിക്രമിച്ചിരിക്കുന്നു. ഈ അധ്യയന വർഷം തന്നെ ഇതിനായി ഒരു പൈലറ്റ് പ്രോഗ്രാം ആരംഭിക്കാൻ സർക്കാർ തയ്യാറാകണം.

കെ-ടെറ്റ്: അധ്യാപകരോടുള്ള അനീതി അവസാനിപ്പിക്കണം

         സർവ്വീസിലുള്ള അധ്യാപകർക്കായി അടുത്തിടെ നടത്തിയ കെടെറ്റ് പരീക്ഷ അത്യധികം കാഠിന്യമേറിയ ചോദ്യങ്ങൾ ഉൾപ്പെടുത്തി അധ്യാപകരെ പരാജയപ്പെടുത്താൻ ലക്ഷ്യമിട്ടുള്ളതായിരുന്നു എന്ന വികാരം ശക്തമാണ്. കാൽനൂറ്റാണ്ടിലേറെക്കാലം സേവനമനുഷ്ഠിച്ച് മുതിർന്ന അധ്യാപകരെ 2.30 മണിക്കൂർ നീളുന്ന പരീക്ഷയ്ക്ക് ഒരൊറ്റ ഇരുപ്പിൽ ഇരുത്തുന്നത് കടുത്ത ശാരീരിക മാനസിക പീഡനമാണ്.

     ഈ വിഷയത്തിൽ പരമോന്നത നീതിപീഠമായ സുപ്രീം കോടതി നടത്തിയ നിരീക്ഷണം അങ്ങേയറ്റം പ്രസക്തമാണ്. ആർ.ടി.ഇ നിയമം വരുന്നതിനു മുൻപ് നിയമിക്കപ്പെട്ട അധ്യാപകർ രണ്ടും മൂന്നും പതിറ്റാണ്ടുകൾ വലിയ പരാതികൾ ഒന്നും ഇല്ലാതെ വിദ്യാർത്ഥികൾക്ക് പരമാവധി വിദ്യാഭ്യാസം നൽകിയിട്ടുണ്ടെന്നും നാളിതുവരെ അവർ പഠിപ്പിച്ച കുട്ടികളും മേധാവികളുമെന്നും അവർ സമൂഹത്തിന്റെ വിവിധ തുറകളിൽ ഉന്നത നിലയിൽ എത്തിയിട്ടുണ്ടെന്നുമുള്ള കോടതിയുടെ വിലയിരുത്തൽ നാം മനസ്സിലാക്കേണ്ടതാണ്.

         2010 ഏപ്രിൽ 1ന് വിദ്യാഭ്യാസ അവകാശ നിയമം (RTE Act) പ്രാബല്യത്തിൽ വരുന്നതിന് മുൻപ് സർവ്വീസിൽ പ്രവേശിച്ച മുഴുവൻ അധ്യാപകർക്കും കെടെറ്റ് യോഗ്യതയിൽ നിന്ന് പൂർണ്ണ ഇളവ് നൽകണം. ഇതിനായി കേരള നിയമസഭയിൽ ഭരണപ്രതിപക്ഷ ഭേദമന്യേ ഐകകണ്ഠേന പ്രമേയം പാസ്സാക്കി കേന്ദ്ര സർക്കാരിനോട് ആവശ്യപ്പെടാൻ സംസ്ഥാന സർക്കാർ തയ്യാറാകണം. കൂടാതെ, കെ-ടെറ്റ് വിജയിച്ച അധ്യാപകരുടെ സർട്ടിഫിക്കറ്റ് പരിശോധനയും വിതരണവും അനാവശ്യമായി വൈകിപ്പിക്കുന്നത് അവസാനിപ്പിച്ച് എത്രയും വേഗം സർട്ടിഫിക്കറ്റുകൾ ലഭ്യമാക്കണം. സർവ്വീസിലുള്ള അധ്യാപകർക്ക് കെ-ടെറ്റ് പാസാകാൻ 2028 ഒക്ടോബർ വരെ ബഹു: സുപ്രീംകോടതി ഇളവ് കൊടുത്തപ്പോഴും, K TET പാസായ തീയതി മുതൽ മാത്രമേ ആനുകൂല്യങ്ങളും പ്രൊമോഷൻ അപ്രൂവലും കൊടുക്കൂ എന്ന ചില വിദ്യാഭ്യാസ ഓഫീസർമാരുടെ പിടിവാശി ശക്തമായ പ്രതിഷേധങ്ങളിലേക്ക് പോകാൻ സംഘടനയെ നിർബന്ധിതമാക്കുന്നു.

അവകാശ നിഷേധങ്ങളും സർവ്വീസ് പ്രശ്നങ്ങളും:-

        കെടെറ്റ് ഇല്ലെന്ന പേരിൽ ചില വിദ്യാഭ്യാസ ഓഫീസർമാർ അധ്യാപകരുടെ വാർഷിക ഇൻക്രിമെന്റും ഹയർ ഗ്രേഡുകളും തടഞ്ഞുവെക്കുന്നത് നീതീകരിക്കാനാവില്ല. ഈ വിഷയത്തിൽ സർക്കാർ ഉടൻ വ്യക്തത വരുത്തി അധ്യാപകർക്ക് അനുകൂലമായ ഉത്തരവ് പുറപ്പെടുവിക്കണം. അതുപോലെ ഗ്രേഡ് അനുവദിക്കുന്നതിന് എൽ.പി, യു.പി സർവീസ് പൂർണ്ണമായി പരിഗണിക്കാത്ത അവസ്ഥ നീതികരണമില്ലാത്തതാണ്. വർഷങ്ങളായുള്ള ഈ സർവീസ് അവഗണനയ്ക്ക് അടിയന്തര പരിഹാരം ഉണ്ടാവണം.

യൂണിഫോം അലവൻസും വിതരണവും:-

              അധ്യയന വർഷത്തിന്റെ രണ്ടാം ടേം തുടങ്ങിയിട്ടും യൂണിഫോം വിതരണംപൂർത്തിയായിട്ടില്ലാത്തതും എയ്ഡഡ് സ്കൂളുകളിലെ യു.പി വിഭാഗം വിദ്യാർത്ഥികൾക്കുള്ള യൂണിഫോം അലവൻസ് നൽകാൻ തയ്യാറാകാത്തതും കടുത്ത വിവേചനമാണ്.

മേളകളും അക്കാദമിക് കലണ്ടറും:-

             രണ്ടാം ടേമിൽ കലോത്സവം, കായികമേള, ശാസ്ത്രഗണിതശാസ്ത്ര സാമൂഹ്യശാസ്ത്രപ്രവൃത്തിപരിചയ മേളകൾ എന്നിവ സജീവമാകുമ്പോൾ, അധ്യാപകരെ വികേന്ദ്രീകൃതമായി മേളകളുടെ ചുമതലകളിലേക്ക് നിയോഗിക്കുന്നത് വിദ്യാലയങ്ങളിലെ പതിവ് അധ്യയനത്തെ സാരമായി ബാധിക്കുന്നുണ്ട്. സ്കൂളുകളുടെ പാനപ്രവർത്തനങ്ങൾ തടസ്സപ്പെടാത്ത വിധം ശാസ്ത്രീയമായ റോസ്റ്റർ സംവിധാനത്തിലൂടെ മേളകളുടെ നടത്തിപ്പ് ക്രമീകരിക്കണം.

ഡിജിറ്റൽ മുന്നേറ്റങ്ങൾ അഭിനന്ദനാർഹം:-

    സർക്കാർ സ്കൂളുകളിൽ നടപ്പിലാക്കുന്ന 'ഡിജിറ്റൽ സ്കോളർ', വിദ്യാഭ്യാസ ചരിത്രവും പ്രാദേശിക വിജ്ഞാനവും രേഖപ്പെടുത്തുന്ന 'സ്കൂൾ വിക്കിത്തോൺ (School Wikithon)' തുടങ്ങിയ പദ്ധതികൾ വിദ്യാർത്ഥികളിൽ വിവരസാങ്കേതിക വിജ്ഞാന സമ്പാദന ശേഷി വളർത്താൻ ഏറെ സഹായകരമാണ്. കാലഘട്ടത്തിനൊത്ത ഇത്തരം സൃഷ്ടിപരമായ ഡിജിറ്റൽ ആശയങ്ങളെ സംഘടന പൂർണ്ണ മനസ്സോടെ സ്വാഗതം ചെയ്യുന്നു.

സംഘടനാ ശാക്തീകരണവും പഠന ഗവേഷണ പ്രവർത്തനങ്ങളും:-

          കെ.പി.പി.എച്ച്.എ സംസ്ഥാന പഠന ഗവേഷണ കേന്ദ്രത്തിന്റെ പ്രവർത്തനം സംഘടനയ്ക്ക് വലിയ ബൗദ്ധിക കരുത്താണ് പകരുന്നത്. സമകാലിക വിദ്യാലയ ഭരണ വിഷയങ്ങളിലും അക്കാദമിക് പ്രവർത്തനങ്ങളിലും പ്രധാനാധ്യാപകരെ കഴിവുറ്റവരാക്കാൻ കൃത്യമായ ഇടവേളകളിൽ നാം നടത്തുന്ന സംസ്ഥാന ജില്ലാതല പഠനക്ലാസ്സുകളും റിസോഴ്സ് അംഗങ്ങൾക്കുള്ള ഡെപ്ത് കോഴ്സുകളും നമ്മുടെ സംഘടനയ്ക്ക് മാത്രം അവകാശപ്പെടാൻ കഴിയുന്ന നേട്ടമാണ്. പഠന ഗവേഷണ കേന്ദ്രം ഡയറക്ടർ ശ്രീ ശ്രീധരൻ ചോമ്പാല മാസ്റ്ററുടെ നേതൃത്വത്തിൽ നടക്കുന്ന ഇത്തരം അക്കാദമിക് ചർച്ചകൾ സംഘടനയ്ക്ക് നൽകുന്ന ദിശാബോധം ചെറുതല്ല.

                സംഘടനയുടെ ഔദ്യോഗിക വെബ്സൈറ്റ് ഏറ്റവും പുതിയ സർക്കാർ ഉത്തരവുകളും ആനുകാലിക വിവരങ്ങളും ഉൾപ്പെടുത്തി മികച്ച രീതിയിൽ നവീകരിച്ചിട്ടുണ്ട്. ലക്ഷക്കണക്കിന് അധ്യാപകരാണ് ഇന്ന് ഈ വെബ്സൈറ്റ് വിജ്ഞാന സ്രോതസ്സായി ഉപയോഗിക്കുന്നത്. ഈ ഡിജിറ്റൽ സംവിധാനം എല്ലാ പ്രധാനാധ്യാപകരിലേക്കും കൂടുതൽ സജീവമായി എത്തിക്കാൻ നാം ശ്രമിക്കണം. സംസ്ഥാന അധ്യാപക അവാർഡ് നേടിയ കെ.പി.പി.എച്ച്.എ കുടുംബാംഗങ്ങളായ ശ്രീ ജെയിംസ്.വി (കോഴിക്കോട്), ശ്രീ ജോഷി.ഡി (തൃശ്ശൂർ) എന്നിവർക്ക് സംസ്ഥാന സമിതിയുടെ പ്രത്യേക അഭിനന്ദനങ്ങൾ അറിയിക്കുന്നു.

മെമ്പർഷിപ്പ് പ്രവർത്തനവും പഠന ക്യാമ്പും:-

               പൊതുവിദ്യാഭ്യാസ സംരക്ഷണത്തിനും നമ്മുടെ ന്യായമായ അവകാശങ്ങൾ നേടിയെടുക്കുന്നതിനും സംഘടനാ സംവിധാനം കരുത്താർജ്ജിക്കേണ്ടതുണ്ട്. ഇനിയും കെ.പി.പി.എച്ച്.എ യുടെ ഭാഗമാകാത്ത മുഴുവൻ പ്രൈമറി പ്രധാനാധ്യാപകരെയും നമ്മുടെ അംഗങ്ങളാക്കുവാനുള്ള തീവ്ര ശ്രമം സബ്ജില്ലാ, ജില്ലാ കമ്മിറ്റികൾ നടത്തേണ്ടതാണ്.

                    2026 ഒക്ടോബർ 2, 3 തീയതികളിൽ തൃശ്ശൂരിൽ വെച്ച് നടക്കുന്ന സംസ്ഥാന പഠന ക്യാമ്പിൽ ഓരോ ജില്ലയിൽ നിന്നും കൃത്യമായി 5 റിസോഴ്സ് പേഴ്സൺമാരെ വീതം പങ്കെടുപ്പിക്കാൻ എല്ലാ ജില്ലാ ഘടകങ്ങളും പ്രത്യേക ശ്രദ്ധ പുലർത്തണം. ഒരുമിച്ചുള്ള മുന്നേറ്റത്തിലൂടെ മാത്രമേ നമ്മുടെ തൊഴിലിന്റെ അന്തസ്സും വിദ്യാഭ്യാസ മേഖലയുടെ ഗുണനിലവാരവും കാത്തുസൂക്ഷിക്കാൻ സാധിക്കുകയുള്ളൂ.

                                                                                                                                                                                                        സ്നേഹത്തോടെ,